نئی دہلی، 23/اکتوبر (ایس او نیوز /ایجنسی)ملک کی راجدھانی دہلی میں نہ تو سردیوں کی شروعات ہوئی ہے اور نہ ہی دیوالی کے پٹاخے جلنے کا سلسلہ شروع ہوا ہے، اور نہ ہی شادیوں کا سیزن آیا ہے۔ اس کے باوجود، دہلی صبح سویرے کہرے کی ایک گھنی چادر میں ڈھکی ہوئی ہے، جیسے کہ کہیں سے دھواں چھوڑ دیا گیا ہو۔ حقیقت میں، پنجاب اور ہریانہ میں کھیتوں میں پرالی جلانے کے واقعات کی بڑی تعداد سامنے آئی ہے، جس کے نتیجے میں وہاں کی آلودہ ہوا دہلی میں داخل ہو کر صورتحال کو مزید خراب کر رہی ہے۔

مرکزی آلودگی کنٹرول بورڈ (سی پی سی بی) کے مطابق بدھ کی صبح 7 بجے کے قریب دہلی کا اوسط اے کیو آئی 349 درج کیا گیا، جو بے حد خراب حالت ہے۔ وہیں، آنند وہار میں ہوا میں آلودگی کی سطح سنگین حالت کو پہنچ چکی ہے۔

اگر کسی علاقے کا اے کیو آئی زیرو سے 50 کے درمیان ہے تو اے کیو آئی اچھا مانا جاتا ہے، 51 سے 100 اے کیو آئی ہونے پر اطمینان بخش، اور 101 سے 200 کے درمیان ہو تو درمیانہ مانا جاتا ہے۔ لیکن اگر کسی جگہ کا اے کیو آئی 201 سے 300 کے درمیان ہو تو اس علاقے کا اے کیو آئی خراب زمرے میں آتا ہے۔ اگر یہ 301 سے 400 کے درمیان ہو تو 'بہت خراب' اور 401 سے 500 کے درمیان اے کیو آئی ہونے پر 'سنگین' زمرے میں شمار ہوتا ہے۔ فضائی آلودگی سے کئی طرح کی بیماریاں ہو سکتی ہیں۔ اسی کی بنیاد پر دہلی-این سی آر میں گریپ زمرے کی پابندیاں لگائی جاتی ہیں۔ گریپ-2 نافذ ہونے کے بعد 5 اہم پابندیاں بھی لگ جاتی ہیں۔

دہلی-این سی آر میں گریپ-2 کے تحت پابندیاں نافذ ہونے کے بعد ڈیزل جنریٹر چلانے پر روک لگے گی، پرائیویٹ گاڑیوں کے استعمال کو کم کرنے کے لیے پارکنگ فیس بڑھائی جائے گی، روزانہ سڑکوں پر میکانیکل/ویکیوم سویپنگ اور پانی کا چھڑکاؤ ہوگا، سی این جی-الیکٹرک بسوں اور میٹروں کی سروس کو بڑھایا جائے گا، آر ڈبلیو اے اپنے سیکورٹی گارڈ کو ہیٹر فراہم کریں گے تاکہ وہ گرمی کے لیے کوڑا، لکڑی یا کوئلہ نہ جلائیں۔ قدرتی گیس، بایو گیس اور ایل پی جی سے چلنے والے جنریٹر چل سکیں گے۔ 800 کے ڈبلیو اے سے زیادہ صلاحیت والے جنریٹر تبھی چل سکیں گے جب وہ ریٹروفٹنگ کروائیں گے۔